Man’s Search for Meaning

Man’s Search for Meaning這本書的作者Dr. Frankl是住在維乜納的猶太人，本身是一個精神科醫生，一直致力防止自殺。他在二次世界大戰時進入集中營，足足三年。

在集中營這個煉獄之中，Dr Frankl是怎樣走過來的？又有什麼體驗？書的第一部份者將自己的心路歷程詳細寫出。他將一個正常人由住入集中營到重獲自由的精神狀態分三個階段。

第一階段是初入營既震驚期，由被扔上囚車開始，Dr Frankl及其他猶太人在死亡恐懼下，走向茫然不知會如何的未來，他們有一個很奇怪的反應，就是會無由來地相信自己會得救、會有奇蹟出現、會有人來拯救他們…直至他們全部被剃光頭、被迫要脫光所有衣服、放下所有財物，在大型澡堂中終於看見喉管噴出來的是水而不是毒氣時；當他們真正是手空空無一物時，有的只是自己赤裸的存在時；他們的反應，很吊詭的是，爆發出優默感，全部都在笑。伴隨而來的，是很強烈的好奇心，好奇想知道自己到底在這樣的冷天下會不會著涼，好奇自己最後會變成怎樣…而幾日後，好奇心會轉化為驚訝…自己竟然没有著涼！原來九個人是可以迫在一個車軚上睡覺，而且仲訓得著！他們没有牙刷而且嚴重營業不良，但竟然牙肉前所未有的健康！…而自殺的這個念頭，都曾或長或短在每個人的腦海中閃過，而且有人真的實行。

但在集中營的時間久了，正常人會被非人化，進入第二個階段，變得麻目不仁，不就覺得自己是人，而是變成那個刺在自己身上的號碼。這個非人化其實是為了保護自己，大腦自動關上感情的總開闢，免得被可怕的現實迫得燒Fuse───發瘋。

他們看見同胞被虐打時，不會再覺得殘忍而轉臉不看，面對這些殘酷的畫面，他們根本没有感覺；我想，這個就是為什麼魯迅在日本流學時看的影片中，當中國人被日軍槍殺时，其他被俘虜的中國人會面無表情地、直直看，没有情緒，放棄反抗。

Dr Frankl自己有一個經驗，就是，有一次他在集中營的病房當值完畢，坐在地上飲他那天分到的熱湯時，碰巧看見有一個剛死了的病人屍體，正被人拉着雙腳在地上拖行。Dr Frankl的視線，正好對上死者已經無神的眼睛…在兩個鍾頭前，Dr Frankl才跟這個病人談話，但現在，Dr Frankl可以若無其事地，繼續喝湯…而且，如果不是Dr Frankl的專業本能而對自己的「無感覺」而吃驚的話，他根本不會記得這件事，因為實在有太少情緒或感覺了。

但，就算在如此麻目的情況下，他們都有憤慨的時候，而引發如此強烈情緒的的原因，往往不是鞭打之類的肉體折磨，而是因為獄卒的侮辱。

由於長期捱餓和營養不良，他們最常做的夢是：蛋糕、麵包、香煙和熱水澡。他們都會在做白日夢，緬懷以前美好的日子，告訴自己這一切都不是真的。當Dr Frankl在冰天雪地下修建鐵路時，就會幻想自己的新婚妻子就在面前，想像自己和她談天；他又會想像自己終有一天被釋放，在一個光線明亮又温暖的講堂之中，向很多聽眾講述自己心理學上的新理論…

就算在如此惡劣的環境下，仍然有人能保持善良與同情心，幫助及安忍同伴，散發終極的人性光輝。Dr Frankl還記得當同伴自己省下食糧，偷偷地塞給他一小塊麵包時，他那一刻的激動，除了因為同伴的慷慨而感動外，他因為這一小塊麵包而感到自己仍然是一個人。



統計顯示，集中營的生還率只有28份之1，而Dr Frankl的觀察是，活下來的往往不是身體最健康或最強壯的人，而是有支持他們生存落去的人。比如Dr Fankl他自己，除了希望有一天能跟妻子重聚、再有一天踏上講台教學之外，他要完成一本書。在最初入營時，Dr Frankl一直帶着他剛完成的一本關於精神科的書的手搞。手搞當然在一入營時已消毁，但Dr Frankl在營中時，在一張紙片寫下關鍵單詞，重新在腦海中再寫出這本書。要發表這本書的信念，支持Dr Frankl活下來。

而Dr Frankl為了鼓勵其他營友的生存意志，往往會讓他們找到對未來的目標。在集中營，最令他們沮喪的是永遠不知道到底要囚禁多久，永不超生的監獄生活，令他們失去了對未來的盼望。但是只要一個人能看他還有生存下去的原因，他就能克服最惡劣的現實環境，努力生存下去。只要一個人知道自己「點解」要生存，佢就幾乎可以解決任何「點樣」生存的問題。


到有一天，集中營豎起白旗，納粹投降，他們被釋放了！Dr Frankl與營友會否像荷里活電影般狂喜歡呼、抱頭慶祝、奔向自由、勇闖玫瑰色色未來，然後打出字幕...The End呢？

唔係喎。

他們是拖住瘦弱既身體，走向集中營大門，小心翼翼地踏出營門。今次没人鬧、没人打他們，而且他們差認不得那些獄卒，他們換走納粹製服，而且還遞香煙給他們添。

他們繼續行出去，第一次用自由人的身份看集中營外的四周，他們不停跟自己講：自由！但是「自由」這兩個字一直都無辦法進入意識，雖然他們在集中營入面這麼多年都夢想自由的一天，但當自由真正來到時，他們感覺不到自由真是屬於自己既。

當晚大家一齊集合時，有人問：「話我知，你今日開唔開心？」

他的朋友由於不知道原來大家都有類似既感覺，所以有ｄ羞愧地答：「講真，唔覺得開心。」

他們已經喪失左快樂的能力，要重新學回。他們由人變成數字，而現在進入第三階段，要由數字變回人。

這一個情況在釋囚身上都會發生，他們以前晚晚都在發夢見到自己重獲自由，正在高興時，集中營的警鐘就會響起，叫醒他們起來面對殘酷的生活...他們怎麼知道今次又係是不是發夢，會不會又再次被夢境所欺騙呢？一切都如夢似幻，没有真實感。

Dr Frankl本人的經驗係在釋放後幾日，他一個人由集中營行去附近的巿集，在佈滿野花的草地上步行了好多好多公里，有幾隻雲雀在天上歌唱。四野無人，有大地、天空和雲雀愉快的歌聲。Dr Frankl停下來，極目四周，望向天，然後跪下來。

那一刻，他腦海中只不停地響起一句說話：「我在自己窄小的監牢向主祈禱，祂以自由的空間回應我...」

Dr Frankl不記得自己跪著重覆這句說話幾耐，但他知道，他的新生命由那一刻開始，他一步步地向前，直至自己重新變成人。

世界權力移向東方

投資者筆記

曹仁超

7月12日，周日。恒指由3月9日11344點上升到6月12日19161點，完成咗68.9％升幅後，出現一個月牛皮市。後市會點？股市變得愈來愈複雜，因為愈來愈多跨境資金及投資者變得愈來愈神經質；再加上經濟學家愈來愈同市場脫節，佢地仲係用教科書上所學去分析家吓嘅經濟，可惜所有教科書都喺金融海嘯發生之前寫成，冇一個「經濟模型」可用作分析家吓嘅狀況。形成今天眾說紛紜現象，令股市自6月12日起已迷失方向。到底一個月牛皮市後再升，定係出現金融海嘯第二波？木宰羊。

中國私家車銷量上半年上升26％，至四百五十三萬輛（商用汽車下降0.5％，至一百五十七萬輛），美國汽車銷量同期下降35％，至四百八十萬輛。中國最大汽車生產商SAIC喺今年內股價上升三倍（同期上證指數只上升71％）；香港上市最大汽車生產商東風汽車（489）今年亦上升兩倍。因為競爭激烈，中國十九大汽車生產商首五個月利潤下降9.9％，其中八家利潤上升、八家利潤下跌及三家虧損；內地汽車股後市點睇？木宰羊，如你有利潤，最好先獲利。

6月份中國出現連續第八個月出口下跌，跌幅21.4%（5月份下跌26.4%），跌幅開始收窄，如同5月份比較更上升4.5%。6月份入口上升2.2%，貿易盈餘收窄到82.5億美元，係最近兩年內最少。估計明年年初中國出口可回復增長，但升幅已唔大。

石油供過於求情況未變

家吓內地銀行股已佔全球銀行股總市值18%，但只控制全球4%總資產。如以市值同存款比較，係日本銀行嘅四倍或高出全球所有銀行60%。擔心內地銀行股已超買，投資者過分睇好內地銀行股了。美國同歐洲去年剛進入去槓桿化；反之，中國喺4萬億元人民幣刺激經濟方案下，今年首五個月銀行新增貸款5.83萬億元人民幣（上半年新增貸款7.36億元人民幣，即6月份進一步狂升）。單單6月份中國汽車銷量上升36％，新屋銷量上升一倍；反之，美國消費者信貸喺今年5月出現連續四個月下降（5月份減少32億美元）。最終全球經濟點走？中國拖起全球、定係歐美拖垮全世界？標普五百指數出現頭肩頂走勢，後市會唔會下跌？美國股市趨勢已改變，但香港投資者人心未變，恒指繼續上上落落。

美國企業又到咗公布第二季業績嘅時候。由於股市自3月起大幅上升，未來如只公布「唔錯」嘅業績，已唔可以支持股價進一步上升，必須有驚喜公布才能令股價繼續上升。

美滙指數由2001年7月至2008年4月回落41%，同期世界經濟出現繁榮期；美國公眾負債由2000年6萬億美元上升到2008年11.5萬億美元。2008年7月至2009年3月美滙指數回升24%，引發全球金融海嘯；今年3月起美滙指數又再回落10%，全球股市上升。但6月3日起美元又再止跌回升，後市又會點？

油價喺上周跌穿由今年2、3月所形成嘅上升軌【圖】，應回落到50美元才再出現支持力。OPEC估計，2013年石油需求係每天八千七百九十萬桶，較前估計少五百七十萬桶；OPEC認為，佢地只需日產三千一百萬桶已足夠應付（較去年日產三千一百二十萬桶還少）。自去年7月至今，OPEC已減產四百二十萬桶，才令油價一度上升至73.5美元。我老曹自去年8月起認為，石油已再次進入供過於求時期，今年3月至今嘅升幅，只因為中國增加石油儲備。6月份EPA已通過，呢個法案認為太多二氧化碳正在威脅地球生態；為阻止溫室效應惡化，各國政府必須加強監管甚至向排放二氧化碳較多嘅行業抽稅。擔心煤礦股成為大輸家！家吓美國電力50%來自煤（香港比重更大），美國煤礦公司Consol Energy已公布暫停兩個煤礦開採，因為唔知道未來政府監管條例有幾苛刻及抽稅幾多，天然氣相信係最大受惠者。EPA亦要求汽車提升燃油效率、發展電能汽車及減少建築物消耗能源。中國亦加入EPA，呢個限制對中國亦有效。

股聖都話要次輪救市計劃

股聖喺上周四話，佢收集七十多個行業嘅資料（唔少係每天數據）。發現家吓同去年9月或10月情況差唔多，代表實體經濟未有改善，例如零售及製造業，最簡單如電力消耗都未見改善。因此佢希望有第二次刺激經濟方案。2月份美國政府提出7870億美元刺激經濟方案後，奧巴馬經濟顧問之一泰森喺上周二認為，美國需要第二個刺激經濟方案。家吓美國政府財赤雖然達到GDP 10%，但通脹率唔高；反之，9.5%失業率卻係二十六年內最高，建議進一步刺激經濟。金融危機只令人類喺金錢上出現損失，實質財富並冇損失。透過刺激經濟方案可令呢D財富喺價格上回升，有助恢復消費者信心。

雖然各國政府口頭上支持美元，但實際上全球喺金融海嘯之後，去美元化卻靜俏俏地進行中。不但歐羅已存在快十年了，人民幣亦加速國際化。7月6日起，香港已成為人民幣跨境結算中心，令人民幣走向國際化跨前一大步，先喺亞太區流通，最終人民幣同美元和歐羅將三分天下。

根據PMI集團（樓按保險公司）分析，美國五十個最大城市樓價其中三十個，有75％機會喺明年仍下跌；有50％機會樓價喺2011年仍下跌。即家吓美國住宅樓價距離見底之日仍遠。

2000年至今根據Dundee Wealth Economics資料，中國消耗銅由2000年一百八十萬公噸上升到2008年五百萬公噸；市場佔有率由2000年13％，上升到2008年28.5％；今年第一季市場佔有率更達38％。同樣情況喺鋁、鋅、鉛及錫方面亦出現。即由2000年起，全球金屬價上升嘅主要因素係因為中國消耗量上升；但到今年上半年全球金屬價格上升因素，唔再係因為中國消耗量上升，而係因為中國大量增加存量；唔少資金更嚟自銀行貸款，相信有唔少係投機性買盤。上半年中國經過六個多月增加存貨量後，喺7月1日起已暫停，後市金屬價又點？會否由boom轉為bust？相信世界銀行估計今年全球GDP下跌2.9％（3月時估計只下跌1.8％）。中國能否單單依靠內需而逃過呢次全球經濟大衰退?!ISM公布6月份美國服務業指數只有47點（50點代表擴張），雖然較5月份44點好，但仍處於收縮期。FDIC宣布到7月1日止，已接管五十二家銀行（其中七家最近先接管）。

中國擁五家全球十大市值公司

經合組織估計，今年歐羅區GDP有可能下降4.8％，而美國GDP下降2.8％。理由係歐羅區出口對象大多係已陷入衰退嘅國家，例如美國、英國和東歐；反而美國出口對象主要係中國、拉丁美洲及亞太區GDP仍在增長嘅國家；加上今年3月起美元滙價較歐羅疲弱，令美國經濟第二季開始出現明顯改善，估計明年美國GDP可上升0.9％；反之，歐羅區經濟家吓仍未擺脫衰退。

依家中石油（857）市值達3560億美元，已趕過美國嘅埃克森美孚，成為全球最大石油公司；工商銀行（1398）亦超過美國花旗銀行總市值；國壽（2628）更大大拋離AIG；仲有中移動（941）等。全球十大市值公司，中國企業已佔咗五家。世界權力重心正由西方移向東方。去年中國GDP 4.4萬億美元，好快超過排名第二位嘅日本（去年GDP 4.6萬億美元）。中國人口係日本嘅十倍，去年零售額只有1.6萬億美元，剛超過日本。中國經濟喺世界出現工業革命前佔全球GDP四分一，家吓只佔6.2％。丹麥投資專家阿蘭．克哀斯滕森認為，中國經濟上升趨勢可再持續多二十至三十年。終極決定係明年全球經濟大方向到底係由中國經濟保持上升而拖動，抑或係因為美國同歐洲經濟無法好起來？加上減息策略同刺激方案已用盡，令股市又再塌下來。

東歐經濟改革失敗原因

八十年代初期，中國經濟喺改革開放政策早期，最先係由香港拉動珠三角經濟，其後中央政府把珠三角嘅成功模式引用喺長三角。到八十年代中國改革開放政策成功例子，引發所謂蘇東波事件，即蘇聯、東歐及波蘭等國家亦利用資本主義制度去改革經濟。不同之處係中國嘅改革開放政策方針係「摸着石頭過河」。任何政策最先喺深圳特區實施，成功後先用喺珠三角，然後長三角，最後才到全國。而蘇聯及東歐等國卻決定採用休克療法，最先喺波蘭試行，就係把全國大部分國營企業證券化，然後把股票分畀每一個市民，並可以喺市場上自由買賣。當時每一個波蘭市民大約可分得相等於當年市值1萬元嘅股票，佢地喺賣出股票後，生活便立即獲得改善。表面上睇較中國嘅「摸石頭過河」政策快好多，令波蘭一下子就變成資本主義制度嘅國家。波蘭經濟改革成功後，呢個策略便喺東歐推行，1993年喺俄羅斯推行。但到咗今年，俄羅斯上市公司嘅股票漸落入由七人創立和領導嘅六大私人財團手中。佢地係別列佐夫斯基、波塔寧、古辛斯基、霍多爾科夫斯基、阿文和弗里德曼及斯摩斯基等。這七人小組旗下六大財團共控制咗俄羅斯50%經濟活動，包括銀行、軍火、稀有金屬貿易、石油、輕工業及傳媒等。呢個七人小組利用同政府官員千絲萬縷人際關係而獲得巨額財富，成為國家經濟命脈嘅寡頭，反過來影響俄羅斯嘅政治、文化及其他領域，令俄羅斯嘅經濟制度由共產主義跌入寡頭壟斷。普通俄羅斯人初期因分到股票後賣掉，而獲得相當於1萬元嘅財富而高興，可惜呢筆財富好快就用完。家吓一般平民認為喺寡頭壟斷下嘅俄羅斯經濟，生活條件甚至唔及共產主義時好，因為貧富實在太懸殊；普京上台後開始對付國內嘅寡頭壟斷，包括把石油巨頭霍多爾科夫斯基送入獄、金融巨頭別列佐夫斯基及媒體大王古辛斯則流亡國外。甚至休克療法之父薩克斯亦承認，快速把國企證券化，好快便出現腐敗性嘅資產壟斷，管理層透過侵吞國有資產，到頭來一般人仍係一無所有。呢個情況突顯鄧小平嘅智慧，家吓中國大型國有企業大股東仍係政府，透過上市去壯大國企而唔係把國企變成股票後分畀普通人。呢個情況證明欲速則不達嘅道理。

向鄰居行乞

2009年7月6日

向鄰居行乞

曹仁超

7月5日，周日。道指由今年3月6日6469點上升到6月11日8877點，係1998年以來升幅最大嘅一季，結束咗連續六季回落，亦即1970年以來最長嘅回落期。奧巴馬上台後，股市由今年3月至6月足足上升37%，理由係政府推出量化寬鬆貨幣政策，即由資金推動股市上升；反之，經濟上美國正式進入低利率、低通脹率、低GDP增長率而同時出現高失業率嘅時代。

火車出軌慢動作版

正當分析界認為環球經濟衰退已度過最低潮之時，上周歐洲央行突然宣布注資4420億歐羅入金融市場，相等於聯儲局過去十八個月總注資額50%；睇嚟歐洲經濟情況亦令人擔心。環球經濟衰退會否進入一波未平、一波又起嘅局面?!舊年已有專家認為呢次衰退係「火車出軌慢動作版」，理由係減債速度永遠較增加負債速度慢。

至於美國製造業情況，根據ISM最新報道已連續回落十九個月，至今未見復蘇，存貨已跌至二十七年低點，以及連續第三十八個月減少，仍未見重建存貨量出現。申請樓按貸款者亦跌至七個月內低點（或較去年同期減少30%），係去年11月21日以來最低。畢非德認為美國政府需要第二個刺激經濟方案。耶魯大學經濟系教授 Robert Shiller 認為，最近出現嘅所謂「綠芽」現象，如不再灌溉，好快就會壞死。奧巴馬年初要求國會通過刺激經濟方案時話，如果方案不獲通過嘅話，美國失業率响今年年底將超過8%。雖然上述方案獲通過，但今年6月美國失業率已達9.5%。單單4月份美國已有超過八千間中小企業申請第十一章。美國人嘅儲蓄率已由去年3月嘅0.2%上升到今年5月嘅7%，造成大量中小企業破產，又何來就業機會？美國6月份又再增加四十六萬七千人失業，依家失業人口已達一千四百七十萬人。

過去被譽為全球最佳中央銀行行長嘅格蛇，自去年起卻成為主要捱批對象。市場認為格蛇過去所採用嘅低利率政策，係引來信貸泡沫造成呢次金融危機嘅元兇；反之，貝南奇則被視為挽救呢次金融危機嘅英雄。真係此一時也，彼一時也。

今年標普五百企業純利估計較去年減少34%，估計明年才回升21%（但仍未收復今年下跌嘅幅度）；加上道指已由3月6日起回升，更令下半年美股前路艱辛難行，難有大作為。

Doug Casey 認為，美股自2000年起已進入二十年熊市，情況同1990年日本接近。至今仍未搞清楚2007年10月開始嘅金融危機將帶領我地去邊度以及如何結束，一切睇各國政府點做去決定。今天美國經濟仍十分脆弱，每月約有六十萬人失去職位；美國實質工資自去年8月起一直回落，消費時強時弱；樓價過去十三個月都在回落，跌幅達16%，估計有機會再跌多10%。加州已有32%業主陷入負資產困局，因銀行仍極度唔願貸出款項。

以超級大熊市角度睇，美股熊市由1966年開始、1982年結束。至於超級大牛市則由1982年開始、2000年結束。2002年10月到2007年10月上升期應係周期性牛市（Cyclical bull market），即喺綿綿不絕嘅超級大熊市中其中一段比較似樣嘅大升市（因2007年10月P/E仍較2000年3月低）。如何响連綿不絕嘅超級大熊市中捕捉呢類周期性牛市或大反彈，例如恒指由2008年11月至2009年6月（美股則由2009年3月至6月）？便十分考功夫也。

全球貨運量下半年續降

何謂趨勢投資法？此法十分強調趨勢（Trend），常用移動平均數組合去分析大方向、阻力區及支持區；加上數據分析及客觀形勢分析，係結合走勢與基礎分析嘅分析股市方法，十分強調你必須認識你所持有嘅股份及所從事嘅行業，唔相信謠言，以及經常保持流動性等。睇嚟長達三十年嘅全球化大趨勢到2007年年底已結束，理由係由1981年起嘅油價回落期，加上貨櫃化、電腦普及化、資訊全球化推動下，令貨物從上海運到芝加哥嘅成本十分便宜；但到2008年油價一度升上147美元，令貨櫃運輸成本較往年上升三倍，令整個全球化大趨勢結束。2009年首季全球貨運量減少20%（同期中國仍大量入口原材料），估計全球貨運量下半年將進一步下降。

1970年代開始，全球愈來愈多女性响婚後出外工作，令家庭收入變成兩個，加上生育率急跌，由1970年代前嘅每個家庭有四個孩子減少至兩個（依家唔少更只有一個）。家庭收入上升，育兒支出反而減少（因子女數目下降），令消費由1960年代佔美國GDP 62%上升到2007年佔72%，而儲蓄率喺2008年則跌至0.2%。不過，上述兩大趨勢亦喺2008年結束。

2008年全球擁有百萬美元家財嘅人數減少14.9％，下降至八百六十萬人；財富減少19.5％，至三十三萬八千億美元。跌幅最細係德國，只減少2.7％；其次係巴西，減少8.7％；跌幅最大係香港，減少61.3％；其次係印度，減少31.6％。

2008年港股係重災區，唔少港人因而變成older, wiser but poorer。

次按危機出現嘅理由係因為過去多年來美國政府對金融業監管不足，加上人民過度消費，造成大量未償還負債出現呆壞賬。上述唔係bailout或刺激方案可以解決嘅問題。社會上中產階級嘅財富主要來自就業（薪金收入）及財富升值（主要係住宅物業升值），依家呢兩方面皆不利。

根據湯森路透報道，今年上半年亞太區財團總貸款金額只有620億美元，較2008年同期減少53.6％；平均每單貸款2.94億美元，較去年同期減少4.2％；完成單數共二百一十一單，減少51.6％，其中46％涉及再貸款（refinance）。香港上述貸款佔68億美元，較去年同期減少32.3％，共十九單。可以講整個亞太區借貸市場都在萎縮中。

1929至1932年美國經濟出現大蕭條。1933年羅斯福上台後提出「新經濟方案」（即凱恩斯理論），才令經濟出現低增長；但到1937年及1938年又再次出現衰退，直到歐洲局勢不穩，資金大量流入美國，美國經濟才繁榮起來，前後達十年。至於日本，由1990年起陷入經濟停滯期，至今仍然未擺脫。

過去二十年日本所經歷過嘅「失落世代」，到底係美國未來經濟嘅前車可鑑（即一切刺激方案最終不敵經濟周期），抑或只係日本單獨事件？今天由華盛頓到北京，政府們都在處理由危機所引發嘅症狀而非成因，透過減息及注資令病徵消失，但病源卻沒有根治，過咗冇耐又舊病復發。上述亦係過去二十年日本政府所犯嘅毛病。大摩亞洲區主席羅奇認為，香港經濟同樣面對W形衰退，甚至中國亦有此威脅，擔心近期A股上升只係「牛面熊身」。2008年美國貨幣以年率14％速度上升，但CPI增長率响過去六十天卻接近負數。美國政府發現製造通脹率同控制通脹率同樣困難。有人話貨幣如水，有唔同形態；有時係冰、有時係液體、有時係氣體。當經濟處於正常情況時，貨幣便有如流水；當經濟進入冷卻期，新增貨幣立即變成冰，失去流動性；當經濟過熱時，新增貨幣又可立即變成水蒸氣，一增加便立即爆煲！今年貨幣流速（Velocity of money）面對經濟冷卻期，雖然政府大量增加貨幣供應，可惜大部分新增貨幣一出街便結成冰，無法再流動。2008／09年度美國政府財赤高達1.8萬億美元，相當於美國GDP 13%！

油價已達偏高水平

九十年代日本，十年中有九年生產價格指數（PPI）係下跌嘅。今天全球已有十四個國家CPI呈負增長，包括愛爾蘭係負4.7％，甚至美國亦出現CPI負1.3％（為近五十九年內最大跌幅）。供應過剩引發通縮，何況美國GDP 72％來自消費。今天美國消費者已筋疲力盡，我老曹唔相信美國經濟可以喺2010年前復蘇，反而擔心美國陷入九十年代日本經濟模式機會甚大。每當政府注資，股市便上升；一旦政府停止注資，股市又再回落。今年上半年美國M（上述數字係估計而非正式公布，因政府已停止公布M數字）增長率估計只有6％，2008年初M增長率仍高達17％。美國家庭去年共失去11.1萬億美元財富，其中22％家庭已進入負資產狀態。以香港過去經驗，一旦陷入負資產困局，消費便大減。以過去十二個月美國大企業純利計算，標普五百P/E已達十四點五倍（過去二十五年平均P/E為十五倍），即美股現水平已唔算偏低矣。道指由今年3月至今已升值12萬億美元，能否抵銷去年美國家庭响財富上嘅11.1萬億美元損失，而令美國人重新增加消費？

今年7月3日止內地A股市值已超過3萬億美元（去年年底1.8萬億美元），MSCI新興市場指數今年上半年升35％（同期世界指數只升2.9）；二十二個新興市場股票市值8.5萬億美元（去年年底5.1萬億美元）。全球資金皆流向新興市場，尤其係中國。中國股票市場2003年年底市值5000億美元，至今已上升五倍，由此可見被睇好嘅程度。至今為止，內地A股係少數大升嘅股市之一，主因係2008年11月中央政府拋出4萬億元人民幣刺激經濟方案，令銀行向企業貸款增長率高達30％（同期企業獲利減少35％）。下半年A股又點？

去年11月至今响中國政府大力刺激經濟方案下（主要透過投資去刺激），令全球油價由34美元一桶升上72美元，相信已經偏高，因為一桶油可產生五百八十萬熱量單位，如用天然氣只需十七分一代價（過去平均數係九比一），因天然氣運送困難，形成售價偏低，但家吓油價同氣價相差已太大。內地企業純利喺今年上半年大跌，响咁情況下，滬深A股下半年面對調整壓力十分大。過去八個月中國FDI大減，情況係1997-98年以來最差。

過去三十年「中國生產、美國消費」嘅搭配，依家亦到咗結束期。過去美國人嘅消費變成中國政府嘅外滙，透過購買美國債券回流美國，壓低咗美元利率，造成美國地產及股市水漲船高。未來美國消費估計由依家佔GDP 72％回落到1980年前水平，即65％。美國人消費唔再大量變成中國政府嘅外滙再回流美國買美債，令美元利率進入上升周期，美國物業及股市亦將進入反覆回落期。2008年由於美國信貸市場急劇收縮，引發流動性黑洞，令美國股樓皆急跌。今年3月美國政府透過量化寬鬆貨幣政策及更改銀行會計守則去粉飾賬目，令股市出現技術反彈，呢類反彈到底可維持幾耐？歷史證明，「資產負債表衰退」通常係長久嘅，未來復蘇過程也係緩慢無力。美國人儲蓄率由2007年嘅負1.7％到2008年3.6％，依家係5.7％，估計好快升會到7-10％，並保持喺呢個水平兩到三年之久，到時美國人嘅負債比率才可下降至安全水平。由此估計，美國不景氣至少持續多兩、三年才能出現復蘇。响咁形勢下，中國出口佔國際市場份額難以快速提高，响全球貿易量大幅下滑壓力下，亦無法快速回升。至於透過優化出口模式，單靠技術提升、品牌拓展、市場擴大等去增加出口產品附加值，需增加投資，短期內難取得較大成效。

保護主義向全球蔓延

中國發改委日前宣布中國停止進一步儲存非鐵金屬。响過去一季，中國增存二十三萬五千噸銅、五十九萬噸鋁、十五萬九千噸鋅及五千噸鈦，理由係今年上半年金屬價已大幅回升。

過去因資源價格、貨幣幣值大幅升降導致中國消費增長率受抑制，扭曲內需結構，令國民儲蓄率過高及投資消費關係失衡。2009年起中國經濟將由過去嘅高儲蓄率、低消費率，走向未來低儲蓄率、高消費率之路；除咗文化傳統習性外，國民收入分配差距大，社會保障不足等都非短期內可解決嘅問題。1992年中國政府及企業可支配收入比重分別佔GDP 19％和13.4％，居民佔67.9％；2005年分別為20.5％、20％及59.4％，即過去幾十年企業收入升幅最大，政府保持穩定，居民收入比重卻在下降，尤其係非熟練工人收入因勞動力供應充足而升幅唔大，只有高收入群因收入主要依靠資本及高質素人力資源，收益大幅上升，造成社會收入兩極化。低收入居民消費佔收入比重較高，係造成中國近年低消費率嘅理由。今時今日，如再提升勞工成本，令企業成本負擔過重，將進一步減少中國出口量。由政府推行社會保障制度，向中低收入家庭提供住房、醫療、教育、養老補貼，响政府財政收入減少環境下，亦係另一項壓力。換言之，擴大內需去抵銷出口下降，非一朝一夕可見功效。

世界銀行公布，由2008年10月至今，共錄得八十九宗保護主義新限制，其中二十三宗發生於今年4月G20峰會之後；WTO所錄得數字更大，證明保護主義正在抬頭。「向鄰居行乞」行為已開始。保護主義繼金融海嘯後正向全球蔓延，估計可令今年全球貿易量下降15％，為1982年以來首次下降。情況有如1930年當美國宣布向九百多項入口產品加稅25％至50％後，1931年法國政府宣布對所有入口產品平均加稅38％、德國宣布加41％；英國响1931年宣布英鎊貶值30％。

2008年11月俄羅斯向鋼鐵產品入口加稅15-20％、汽車入口稅加30％、貨車及巴士入口稅加25％；今年4月印度向鋼鐵產品入口宣布加稅5％、大豆加稅20％及禁止中國玩具入口；阿根廷及巴西宣布向酒類、皮革、農產品、橡膠及紡織品加稅5-20％。保護主義除咗利用關稅外，另一方法就係將貨幣貶值，或利用環保作為理由，禁止別國產品入口，甚至限制資金流入或流出，咁做最終會令全球GDP陷入低增長甚至負增長。

今年第一季度中國星級酒店平均出租率只有62.5%，較去年同期下降5%。最麻煩係五星級酒店，以北京五十多家五星級酒店為例，真正有盈利者也不過五、六家。去年起全國各大城市高檔酒店入住價格持續下跌，至今尚未見底。世界旅行及旅遊理事會總裁鮑姆加頓估計，世界旅遊業衰退期將持續至2010年。大多數旅行者選擇喺本國旅遊，使長期以入境旅遊高端遊客為主要收入體系嘅五星級酒店受到前所未有嘅打擊。依家中國境內旅遊佔全國旅遊總量92%，每位旅遊者平均消費500元人民幣，大部分住唔起高檔酒店。高檔酒店以服務小眾市場（入境旅客）為主，但中國家吓在建或改建中嘅五星級酒店多達一千七百餘家，唔少由政府投資嘅酒店並唔完全以盈利為導向，通過財政補貼去運轉，目的係帶旺該地區商業；亦有D係地產商嘅投資，並非真心真意做酒店，而係透過投資酒店向地方政府獲得免稅優惠去發展房地產生意，部分更係炒地皮為目的嘅短線投機者。上述種種因素造成中國高檔酒店長期處於供過於求水平。

香港年輕人進入Generation R

我老曹一方面在預計通縮，另一方面卻在推介黃金，係咪好矛盾者？唔少人應該仲記得七十年代响惡性通脹影響下金價狂升期，卻唔知道响通縮環境下金價亦可上升（例如整個三十年代）。去年10月23日至今年2月20日，金價大升50％後才出現獲利回吐，相信消化完成，另一次上升可期。美國有四十六個州以6月30日為年結日。2008／09年度其中十個州面對財政危機，最嚴重係加州同阿利桑那州，前者短缺240億美元，相等於該州總收入26%；後者短缺30億美元，相等於該州總收入30％。聯邦政府點樣應付上述危機？會否又再印銀紙？家吓美滙指數响低位仍有支持，冇咩太大問題，但係咪依家購入小量黃金嘅時候？甚至有人認為白銀更吸引。估計2008／09年度（9月結）美國聯邦政府財赤高達2萬億美元，上述數字有幾多來自稅收、有幾多來自發債、有幾多來自印銀紙？

上周日本年輕人聚集响公園內，手持橫額抗議就業率下降及缺乏升職機會。1960年代美國經濟進入滯脹期，美國年輕人以反越戰為名，亦曾出現全國性浪潮。今天香港 MILK 雜誌（反映年輕人）亦抗議我老曹呢一代炒貴晒D樓同股票，同時唔肯退休，阻礙佢地就業同升職嘅機會。可以講，今天年輕一代對我地戰後嬰兒潮一代嘅不滿，在全球已隨處可見，例如日本股市已回落二十年，香港樓價1997年至今十二年只出現V形反彈。香港年輕一代前途係點？1980年代香港面對製造業職位流失，從事工業者過去三十年所受打擊十分沉重。2007年10月香港面對金融危機，會否一如1990年代日本，年輕人進入Generation R（衰退一代）？繼金融業之後，香港仲可以發展咩嘢？知識產權？唔好自欺欺人啦。我老曹擔心香港年輕人亦已進入迷失一代矣！

■多謝港燈公司（006）向農家女學校捐助2萬港元，已代為滙上；亦多謝南門地產代理公司1萬元捐款，由於善款剛滙出，因此南門地產嘅捐款只有留作下次；另在溫州開研討會時一位唔願透露名字嘅內地讀者捐款500元人民幣，亦將代為滙上。